SRS in HK 消息剪報。
Updated: 2006-05-13T13:10. 加入 060513 蘋果日報報導。
2006-05-13
- 臨門撻Q：卡通歌王演唱會臨門撻Q「蝕都要開」 (蘋果日報 E07 flu流感)
還記得《鐵甲萬能俠》主題曲雄壯、熱血的聲音嗎？主唱者水木一郎原定來港於昨晚及今晚連開兩場《超級機械人大戰──魂》演唱會，臨門一腳，卻因門票銷情不理想而宣布取消，令各位引頸以待的Fans自本年2月延期後再度失望。記者起初都以為Fans得三幾個，個個都係電車男，點知水木Fans由2字頭到4字頭都有，當中更不乏大學教授！
記者：曾冠輝；攝影：陳盛臣、譚盈傑
教授Fans一樣狂熱
咪以為聽得水木一郎都係匿喺屋企嘅電車男，大學教授一樣可以係佢Fans。年屆4字頭的吳偉明教授是典型的日本動漫畫迷：「70年代日本機械人動畫啱啱傳到香港，當時嘅我就日日睇住《鐵甲萬能俠》長大，連主題曲都跟住水木一齊唱！有啲歌到家都識唱！」
兼職講師何故是3字頭的代表，他有幸嘗過水木一郎演唱會的現場氣氛：「我試過去日本睇水木一郎嘅演唱會，佢好識帶動現場氣氛，做一個簡單嘅手勢，台下觀眾自然會跟住做，加上佢不時喺台上振臂嚎叫，個氣氛同香港演唱會無得比。」
「香港有足夠Fans！」
講到演唱會難產，大家不約而同大彈製作公司宣傳不力。演唱會原定2月舉行，當時吳教授更義務幫助宣傳：「我將演唱會張海報貼咗喺網頁，即刻收到萬多個點擊率同過百個留言，好多人都係透過個網頁先知道有演唱會！」，而何故就認為這次演唱會的製作公司經驗能力不足所致：「今次製作咁認真，但只由一間規模唔大嘅公司做宣傳，唔係好合理。」吳教授補充：「香港絕對有足夠嘅Fans支持今次演唱會嘅！」何故：「就算係蝕佢都應該照開啦，起碼唔好辜負班Fans，話唔定今次效果好，可以有下次呢？」
「眼瞓聽，唔使飲咖啡！」
吳教授自言最喜歡的動畫都是最始祖（第一代）的，包括第一代的機械人動畫《鐵甲萬能俠》及《三一萬能俠》，他形容當時的卡通及主題曲都很熱血：「當時嘅卡通都善惡分明，正義嘅主角永遠都好熱血，永遠都打贏壞人；水木一郎唱嘅主題曲又好有氣勢，嗰時讀書讀到眼瞓都唔使飲咖啡，聽吓佢嘅歌就燃起鬥志精神晒。」
水木一郎係乜水？
水木一郎於日本有「動畫歌帝王」之稱，自70年代初起致力演唱動畫歌曲，主要作品有《鐵甲萬能俠》、《鋼之魂》以及《超級機械人大戰》主題曲。至目前，推出作品已超過1,000首。而《鐵甲萬能俠》的原聲大碟竟賣出70萬張，是動畫音樂史的空前紀錄。70萬張多嗎？給你參考：主流歌手過百萬張就是天王天后級了。（繽崎步99年大碟銷量達120萬張）
玩具、漫畫店：賣飛到停賣都無人知
不願出鏡的超人玩具老闆黃Sir，也認為這次演唱會缺乏宣傳，也是因為行家告訴他才知有此事，他謂：「我有好多熟客都係水木Fans，如果佢有擺飛喺我呢度賣，起碼票房多幾十張啦！我哋連海報都無張，失驚無神話收番晒啲飛，我都唔知發生咩事！」
市區模型店無票賣，反而屋邨漫畫店有，天水圍「怡趣」老闆黃先生話：「3間分店夾埋都係賣咗兩張，早兩日仲突然收番晒啲飛，製作公司又無交代發生咩事，仲以為啲飛喺出面（市區）好好賣而要拎出去㖭！」
狂熱網友 自製海報
那邊廂宣布演唱會取消，這邊廂多少Fans失落沮喪，忠實Fans「頹青」更於博客內以「肥皂泡」形容這個一睹水木一郎台上風采的夢想，以「我的心在淌淚」形容他的傷心程度。
頹青是文化研究系一年級生，基於對日本動畫及主題曲的鍾愛而自學日文，大部份的日語主題曲都能順口唱起來。他本來召集了網友一起到場支持水木，他更為了這次演唱會而有所準備：「我託朋友幫我設計了一張海報，希望到時可以用嚟集合大家一齊支持水木，可惜家無機會……」
對於演唱會告吹，頹青心情已漸平復，他表示：「可能會改約各位網友去銅鑼灣間日本卡啦OK度唱吓啲主題曲發洩啦！」
退票查詢
製作公司已於網頁內正式宣布《超級機械人大戰──魂》演唱會取消，各位已經買咗飛嘅朋友可以去以下嘅網址/電話查詢： http://www.studio814.net。查詢電話：3144 4166
2006-05-12
- 演唱會突取消遭投訴 (頭條日報 P-08 港聞)
七十至八十年代日本卡通片，勾起不少中年人的集體回憶。有港商以日本經典卡通片原唱者訪港為噱頭，舉辦名為「超級機械人大戰魂」演唱會(見圖)，演期原定在二月，但一拖再拖，前日更突然透過網站宣佈取消演唱會，有已訂票的顧客擔心受騙，向消委會投訴。
演唱會門票售價分二百八十元和四百五十元。主辦單位昨在網上宣佈取消演唱會，但未有解釋原因，只表示將以個別方式通知顧客安排退票事宜。警方表示，暫未接獲有市民投訴。
- 演唱會取消惹騙局疑雲 (太陽報 A22 港聞)
【本報訊】原定於今、明兩晚在九龍灣展貿中心舉行的日本動畫經典金曲《超級機械人大戰魂》演唱會，因門票銷情慘淡終取消，主辦機構據稱虧損約一百萬元。由於前晚突傳出演唱會取消消息，負責人亦一度不知所終，惹來騙局疑雲。主辦機構昨晚終在網頁上宣布演唱會取消，並安排下月接受退票。
負責人陳先生昨日到牛頭角警署備案，他表示，演唱會受人不斷發放謠言中傷才被迫取消，將諮詢律師意見決定會否採取行動。對於過去兩日「失蹤」，他表示自己甲狀腺一直有問題，加上籌辦演唱會的壓力，終致暈倒需入院兩天。
是次演唱會門票分為四百五十元及二百八十元兩種，主辦單位「Studio 814 Media」及提供網上訂票的「crossmedia」昨表示，已購票人士可於下月一日起，到荃灣楊屋道145-159號大堂辦理退票手續。
Comments
Post a Comment